繼續同史友們介紹香港嘅特色地名,相信提起柴灣同埋荃灣呢兩個相距甚遠嘅地方,史友們都一定知道係邊度嚟,但如果阿史講到其實荃灣區入面都有一個「柴灣」,大家又知唔知呢?

阿史講緊嘅並唔係真係東區嘅柴灣,而係位於荃灣區內嘅「柴灣角」。柴灣角歷史相當悠久,以往曾經出土過新石器時代同埋漢代嘅文物。柴灣角呢個名喺早年英國人所製嘅地圖就已經出現,具體嘅位置大概就係荃灣西部,係市中心同埋荃灣西約之間嘅範圍。

現時嘅柴灣角就被開闢成工業區,但其實喺荃灣漁業仲未式微之前,呢度都仲係一個海角,有客家人喺度建立寮屋居住,但政府決定將荃灣發展成新市鎮之後,呢度就隨即填海發展成工業區,呢個情況嚟到今時今日都仲維持緊。

原圖嚟自網絡