今時今日提起「雀仔街」,可能唔少後生嘅史友都會諗起園圃街,但如果史友們仲有印象,應該都會知道以前嘅果條「雀仔街」其實就係康樂街,而園圃街就係因為重建項目而令到原「雀仔街」販商搬遷過嚟而建立嘅。咁問題嚟啦,就係康樂街本身係點樣發展成「雀仔街」呢?

康樂街原本就係九龍旺角西部嘅一條街道,咁大家都知道以前呢度係以售賣雀鳥、鳥籠及相關用品為主,但其實喺1970年代左右,呢度先至開始成為「雀仔街」。喺1960果陣,旺角一帶都有唔少雀鳥愛好者,早年嘅雀友都好鍾意帶埋自己隻愛雀去到茶樓,咁當時旺角上海街就有一間「奇香茶樓」,係唔少雀友聚集嘅地方,所以呢區都有唔少商販聚集。

之但係去到後來「奇香茶樓」就倒閉,商販眼見冇晒茶客就轉移去到另一個較好嘅地方擺檔,亦即係康樂街。最初嘅時候,康樂街就只係得10個小販賣草蜢,但後來慢慢發展落去,就有更多小販賣埋鳥籠、雀粟,全盛時期有接近80幾間商鋪,真係熱鬧!

時間去到90年代,土地發展公司發表「亞皆老街/上海街重建計劃」,「雀仔街」販商喺1997年就搬遷到近花墟道一帶,亦即係今時今日嘅園圃街雀鳥花園。

原圖嚟自網絡