「中國原子彈之父」——錢三強

早幾日阿史就同大家介紹到為雙星定位、北斗奠基嘅航天專家陳芳允，而近代中國出色嘅科學教仲有唔少，今次阿史就想介紹下呢位有「中國原子彈之父」之稱嘅錢三強。

錢三強出生喺1913年嘅浙江紹興，佢嘅父親正係中國近代語言文字學家錢玄同，而錢三強自己都天資聰敏，喺1936年清華大學物理系畢業，畢業之後佢就曾經做過北平研究院物理研究所助理，但冇幾耐就去咗法國巴黎大學居里實驗室、法蘭西學院原子核化學實驗室從事原子核物理研究工作，仲拎埋博士學位，佢當時嘅老師正正就係居里夫婦。

錢三強喺完成學業之後，並冇選擇留喺法國，反而係喺1948年返到中國，擔任中國科學院近代物理研究所副所長、所長、甚至仲做埋中國科學院副院長。而提到錢三強最大嘅貢獻，就係作為原子能學科學術帶頭人，為中國嘅國原子能事業作出長遠嘅計劃，亦都為「兩彈一星」挑選同埋培養大批優秀人才。值得一提，其實錢三強夫人何澤慧亦都係出色嘅科學家，喺清華大學畢業、德國留學，最後返到中國作出貢獻，所以佢同錢三強係被稱為「中國居里夫婦」。