中國首次奪得世乒錦標賽男子團體冠軍

中國乒乓稱霸世界就已經係一件維持多年嘅事，甚至有唔少史友都係國家隊嘅粉絲，之但係大家又知唔知我國嘅健兒係幾時開始成長呢？今日阿史就想介紹一下呢一個重要嘅里程碑。

喺1961年嘅今日，係第26屆世界乒乓球錦標賽嘅日子，當年呢個比賽喺北京舉行，而中國隊其實只係喺1953年第一次參加世界乒乓球錦標賽，以往嘅表現亦都唔太好，喺身三輪比賽入面全部選手都止步。而當時50年代真正稱霸世界乒乓球壇嘅其實係日本，當時中國嘅選手其實都面臨住好大嘅壓力。

之不過，喺當年今日嘅呢次錦標賽入面，中國選手就好似莊則棟、丘鍾惠都成功打到男女子單打冠軍，甚至仲有四項亞軍、八個季軍，成績相當優秀，特別係男團仲第一次拎到男子團體冠軍。而當時男團決賽前選手容國團就講咗一句話「人生能有幾回搏，此時不搏何時搏？」。呢句說話激勵咗唔少人，最後仲以2-1比數擊敗對手。呢次男團奪冠，被唔少媒體形容係終止咗日本以往稱霸乒乓球壇地位。