記得早幾年，中國發表咗《中國的北極政策》白皮書。唔少人都覺得奇怪，中國國土唔响北極圈中，點解會制定北極政策呢？據白皮書內容，有關北極事務係「由《聯合國憲章》、《聯合國海洋法公約》、《斯匹次卑爾根群島條約》等國際條約和一般國際法予以規範」。而唔少內地網民估唔到原來中國通過《斯匹次卑爾根群島條約》而擁有海外「屬地」。

咁《斯匹次卑爾根群島條約》又係乜嘢條約嚟呢？《斯匹次卑爾根群島條約》係响1920年簽訂，亦係近代中國一項重要國際條約。斯匹次卑爾根群島位於北冰洋一個群島，自從呢個群島响十六世紀被發現後，就成為西方國家爭奪嘅地方，因為各國都希望可以控制呢個海域同群島上嘅天然資源，而呢個島主權誰屬都一直存有爭議。响二十世紀初，挪威就向各國提出斯匹次卑爾根群島嘅主權確定，但未有得到各國響應。直至一戰結束後，各國為咗解決斯匹次卑爾根群島所帶來嘅爭拗，最終响1920年簽訂《斯匹次卑爾根群島條約》。根據《條約》，群島主權係屬於挪威，但各締約國嘅公民就可自由出入呢個群島，從事合法經濟活動或科學考察等。

咁呢條條約又關中國乜事呢？咁係因為中國亦係當年締約國之一，當時代表中國嘅北洋政府就响條約上簽字。不過，响一百年前呢個同中國相距太遠，根本唔存在乜嘢實際利益。有研究就話北洋政府獲法國邀請成為締約國，一方面係法國希望增加《條約》國際影響力，另一方面北洋政府就想通過成為締約國提升中國國際地位。但估唔到，呢條條約响一百年後會成為中國有份參與北極事務嘅一個重要憑證。不過，有啲內地網民認為呢個地方係中國擁有海外屬地，似乎就唔係咁喇！

原圖：網絡