講咗幾個星期西域，我哋一跳跳返去遠東地區。海參崴呢個城市相信有唔少史友都聽過，呢個俄羅斯遠東最大嘅沿海城市，係俄國响東北亞地區一個重要嘅戰略重鎮。之但係，呢個地方原本唔係屬於俄國。


海參崴，响滿語嘅意思係「海邊的小漁村」，俄語官方譯名係符拉迪沃斯托克。早响唐代呢個地方係屬於渤海國嘅領土，當時呢個國家同唐朝係有藩屬關係。到咗宋代期間，渤海國就被遼國所滅，呢個地方就由遼國所統治，經歷金朝、元朝同明朝，呢個地方都受中原政權（將遼金都當係）統治。

不過，到咗清朝呢個情況出現咗重大變化。十七世紀中期開始，沙俄皇朝向東擴張領土，東北亞地區成為佢哋嘅目標。康熙時清廷同沙俄政府簽訂《尼布楚條約》，條約列明「將自北流入黑龍江之綽爾納即烏魯木河附近之格爾畢齊河為界，沿此河口之大興安嶺至海，凡嶺陽流入黑龍江之河道，悉屬中國，其嶺陰河道，悉屬俄羅斯。」參照條約內文，海參崴屬「河界」以南地區，所以係歸大清國境範圍。

可惜，大清國力响十九世紀急劇衰落，清廷同俄國响1858年簽訂不平等《璦琿條約》，規定包括海參崴在內嘅烏蘇里江以東40萬平方公里地區全為中俄共管；到咗1860年嘅《北京條約》，呢個「共管地區」清廷直頭割讓咗俾俄國。就係咁，海參崴就成為俄國領土嘅一部分。到咗民國時期，國民政府雖然一直爭取廢除所有不平等條約，但基於遠東地區嘅地理戰略價值，史太林拒絕將呢片土地還返俾中國，海參崴亦成為蘇聯遠東地區最重要嘅海港城市。

咁依家呢個地方有無仲有主權爭議呢？响蘇聯解體後，中俄兩國先後簽署協定同合作條約，確定海參崴係屬俄羅斯境內。而响「一帶一路」戰略之下，中國有意規劃建設琿春至海參崴高速鐵路。

講多句，十幾年前周杰倫响海參崴拍過MV，當年睇完之後好想去呢個城市睇睇，可惜，咁多年嚟都未起行。