話說今年就係中美「乒乓外交」50周年嘅日子，而近排又係中美關係近呢幾十年嚟最低迷嘅一段時間，所以都有唔少人提起當年令到中美關係破冰嘅一場活動，就係「乒乓外交」喇！就連我國嘅駐美大使崔天凱都提起呢件事，仲希望美方可以「相互尊重、求同存異」。咁到底當年嘅「乒乓外交」係點樣令到中美關係破冰呢？阿史今次就同大家講一講啦！

所謂嘅「乒乓外交」其實就係發生喺20世紀70年代，當時美國嘅國際地位同國力因為越南戰爭而下降，相反中國兩彈一星項目成功，再加上中蘇關係亦都開始交惡，令到美國爭取想同中國結盟，就連後來基辛格都表示，尼克遜上任初時都諗盡辦法可以同中國聯繫。呢件事嘅發生就係緣於一位美國球手科恩上錯車，中國選手莊則棟主動上前同他握手而成為傳媒熱話，最後新聞傳到返中國而促成呢件事。

而喺1971年4月 10日，受到邀請嘅美國兵乓球協會4位官員、科恩、雷塞克等9位運動員成為自1949年以來第一批獲准進入中國境內嘅美國運動員，唔單止可以喺北京同埋上海參與兩場比賽，仲可以遊覽長城、清華大學等地方，周恩來總理甚至仲喺人民大會堂會見代表團。

而作為回報，美國兵乓球隊亦都邀請中國兵乓球隊1972年4月11日訪問美國，參觀咗底特律工業基地、迪士尼樂園。呢次雙方外訪被外界稱為「乒乓外交」，亦都結束咗中美兩國20幾年嚟人員交往隔絕嘅局面，其後亦都促成美國國務卿基辛格（Henry Kissinger）與美國前總統尼克遜（RichardNixon）隨後陸續訪問中國，喺1979年同台灣斷交並且正式同中華人民共和國建交。

原圖嚟自網絡