提起盧溝橋，相信唔少史友都會諗返起我地民族嘅傷痛——「盧溝橋事變」，但今次阿史就想轉一轉角度，同大家介紹下呢座橋嘅歷史。

盧溝橋其實係作為中國古代四大名橋之一，原名就叫做「廣利橋」，佢所在嘅位置就係永定河上，亦即係宛平城附近。而喺1192年4月24日，呢條咁重要嘅橋樑就正式建成，自此就成為交通嘅要道，甚至仲曾經設有稅課司喺橋上。

其實喺古代盧溝橋所在嘅位置就係盧溝河，河上曾經就有一個重要嘅渡口，後來喺大定二十八年，金朝皇帝金世宗為咗可以方便使者同埋旅人，就下令要喺盧溝河上興建石橋，而喺工程展開同埋建成後，呢條建成嘅橋樑就被稱為廣利橋，而喺後來《馬可·波羅遊記》入面，因為曾經被記載過，所以呢條橋又多個別名叫做「馬可波羅橋」。

而喺金代同埋元代之後，盧溝橋嘅橋面、欄板都曾經更換過，單係明、清兩代就已經作過十二次維修，而呢條橋仲成為明清年間北京城重要通道之一，直到盧漢鐵路建成，呢條橋嘅交通作用先慢慢減低。

原圖嚟自網絡