話說尋日就係中國航天日，喺呢個咁特別嘅日子國家航天局啟動咗中國航天大會開幕式，同時亦都宣佈中國將會有第一架火星車，並且會以中國神話入面嘅火神祝融命名，到底當中有咩寓意呢？阿史今次就同大家介紹下啦！

提起祝融，相信唔少史友都會諗起佢係火神，又或者諗起好恐怖嘅祝融之災，但其實係古代「祝融」其實係一個相當好嘅寓意。據《左傳》、《山海經》等古書記載，祝融原名叫做重黎，係五帝之一顓頊嘅後代，亦都係帝嚳「火正」之官，火正就即係掌管火焰嘅官員。而喺道教嘅傳說入面，上古氏族燧人氏發明鑽木取火之後，真正識得使用同保留火種嘅，正正就係祝融，所以佢就被視為火神喇！

根據古書記載，「祝」係解做永遠、繼續嘅意思；至於「融」就係光明嘅象徵，所以兩者加埋一齊係指以持續嘅希望之火照耀大地、為人類帶來光明咁解，所以係一個相當好嘅願景。

原圖嚟自網絡