之前講起葉繼歡,好多人都知佢係頭號通緝犯,當年香港警方仲懸紅100萬元通緝佢歸案。不過,葉繼歡呢個懸紅金額,就唔係香港警方最高懸紅紀錄。

咁邊個咁巴閉懸紅金額高過賊王葉繼歡呢?佢就係另一位賊王季炳雄。季炳雄同葉繼歡一樣,曾參與多宗大型械劫案,係出晒名嘅悍匪,活躍於八十年代至千禧年後。佢唔單止參與咗多宗械劫案,响2001年被警員截查時近距離向警員開槍。呢單槍擊案發生後一個月佢又去打劫旺角一間錶行,劫走二百幾萬嘅財物。响2001年,警方宣佈懸紅200萬港元通輯季炳雄,成為香港警方史上最高懸紅金額。後嚟警方掌握到佢行蹤,响2003年12月24日平安夜凌晨,警方出動飛虎隊成功拘捕季炳雄同佢嘅同黨。2005年2月高等法院裁定季炳雄非法藏有軍火罪名及使用槍械意圖抗拒合法逮捕罪成,刑期合共為24年。响赤柱監獄服刑嘅佢,响減扣三分一年期後,於2020年刑滿出獄。

原圖:網絡