繼續同史友們介紹三國嘅一啲故事,提起三國當然就要講下呂布,而同呂布有關嘅一件可能唔少史友都會諗起「轅門射戟」,咁阿史今次就同大家介紹下啦!

「轅門射戟」呢個歷史典故最早係出自《三國志·呂布傳》,喺公元195年,當時袁術出軍攻打徐州,而當時其實袁術為咗可以打敗劉備,就寫信煽動呂布部將郝萌發動兵變,但好快就被呂布嘅大將高順平定咗佢嘅叛亂。而去到公元196年,袁術就再次派軍征討劉備,劉備喺呢個時候就向呂布求救,而呂布亦都答應咗佢嘅請求。

袁術大將紀靈得知呢個消息,就請呂布一齊商討。當時呂布就表示劉備係佢賢弟,佢前來就係為咗救佢,講完之後就喺營門前方豎起一支戟,並且講明自己要進行「轅門射戟」,如果成功咗嘅話,各方就要解兵,如果失敗嘅話佢就唔會再干預。結果呂布引弓向戟射出一箭,亦都真係成功咗。之不過,喺正史入面呂布就應該係用矛作為兵器,真正嘅「方天畫戟」亦都係去到宋代先至出現嘅。

原圖嚟自網絡