提起喪權辱國嘅《馬關條約》,相信唔少史友都曾經聽過,亦都知道條約當中內容,而喺當年今日,就有一件相當具標誌性嘅事發生,而呢一件事就係康有為公車上書喇!

經歷過光緒二十年嘅中日甲午戰爭後,當時作為戰敗國嘅清政府就簽訂《馬關條約》割讓台灣及遼東,賠款白銀二萬萬兩等。得知呢個消息後,當時參加完乙未科會試嘅各省舉人雲集北京,隨即群情激憤。以康有為、梁啟超為首嘅維新派就寫成一萬八千字《上今上皇帝書》,並且得到十八省與奉天三省舉人接連響應。

呢個行動喺1895年5月2日進一步升級,康有為、梁啟超帶領各省舉人集於「都察院」門前請代奏光緒帝,呢件就係史稱嘅「公車孝廉連署上書」。而當中所謂嘅公車有兩個講,可以解作「地方舉薦到中央做官」嘅意思、又可以解做皇宮接待臣民嘅機構。而呢次運動就喺當年今日發生,更被認為係中國群眾政治運動嘅開端。

原圖嚟自網絡