繼續同史友們介紹一啲近代中國嘅重要人物,以往都同大家講唔少科研嘅英雄,而今次就想轉一轉方向,同大家介紹下呢位有「農民將軍」之稱嘅甘祖昌。

甘祖昌出生喺1905年嘅江西省一個貧苦農民家庭,喺1926年嘅時候就參加咗農民協會,隨即仲加入埋中國共產黨、擔任鄉土改委員會主任。咁佢又係幾時開始參軍呢?原來去到1928年,佢就加入咗中國工農紅軍,後來就做過獨立團軍需處處長,西北野戰軍縱隊後勤部部長等職位。去到開國之後,佢就曾經去過新疆軍區做過後勤部副部長、部長,喺1955年就被授予少將軍銜。

之但係,喺長年嘅戰事當中,甘祖昌就多次受傷,至少有三次係傷到頭部,導致有嚴重腦震盪後遺症。得知佢嘅處境,身邊唔少人都勸佢去更好嘅地方休養,但甘祖昌毅然決定喺1957年帶住家人返到家鄉投入建設家鄉嘅工作。自此次後,佢就基本上日日都喺三分之一土地都係冷漿田嘅村落進行生產勞動,歷時五年先至可以將畝產量提高兩倍。

如是者呢位將軍喺農村生活接近三十年,同民眾同甘共苦,甚至仲將自己嘅人工捐畀家鄉建設水利設施,佢嘅無私亦令佢被稱為「農民將軍」。

原圖嚟自網絡