長洲搶包山發生意外

話說仲有一個星期左右，就係長洲太平清醮嘅日子，而喺當年今日，就有一宗同呢個傳統節日有關嘅悲劇發生，呢件事就係1978年長洲塌包山事件。呢場意外嘅發生令到成個搶包山習俗足足停咗27年，直到2005年先至復辦。

長洲搶包山嘅歷史相當悠久，相傳係喺百幾年長洲發生瘟疫果陣，島民得到玄天上帝指引成功驅除瘟疫，事後島民為咗答謝北帝，就喺島上舉行太平清醮，喺打醮期間必需禁止殺生及進行齋戒，而鋪滿平安包嘅包山就係喺拜祭過後等居民可以領取嘅。

喺1978年5月9日，長洲居民就如常按照傳統，喺凌晨12時敲響銅鑼進行搶包山，但點知當300幾個參加者爬到上3座包山嘅時候，包山就開始倒塌，居民隨包山墮下，事件造成24人受傷，搶包山亦都喺呢一年開始被禁。