上次阿史介紹咗中國跳水名將熊倪响1988年漢城奧運一戰成名，可惜响高水平發揮下輸俾美國跳水皇帝盧根尼斯，雖然熊倪同奧運金牌擦身而過，外界因而稱為佢「無冕之王」，仲好期待佢响四年後巴塞羅那奧運捲土重來。可惜，熊倪响之後個屆都係錯失咗金牌。

响漢城奧運之後，熊倪成為咗中國國家隊跳水隊嘅主將，响1992年巴塞羅那奧運會前，佢取得多項國際級賽事冠軍及晉身三甲，包括1989年世界杯男子跳台冠軍、1990年亞運會男子跳台冠軍等。响1992年巴塞羅那奧運會舉行前，當年仲係18歲嘅佢就被捧為男子高台跳水嘅奪金大熱，而响預賽中佢都拎到第一名。不過，到咗決賽當日，佢表現就有所失準。當時中國跳水隊除咗熊倪外，仲有另一位冒起跳水新星孫淑偉。當年只係14歲嘅佢响決賽表現出色，亦較熊倪穩定，最終1992年巴塞羅那奧運會男子10米高台跳水金牌就由孫淑偉奪得，表現失準嘅熊倪只能取得銅牌，再一次錯失奧運金牌。

多年之後熊倪憶述返當年情況，佢話當年佢對奧運冠軍得失心太重。响預賽拎到第一時，佢心裡面就有啲浮燥，沉唔住氣，因為壓力太大，搞到決賽前一晚成晚幾乎無瞓過。到咗決賽個日心情就得急燥，指定動作出現小小瑕疵，就令佢更心急，之後就咁不斷出錯。佢仲話比賽結束後，佢一個人忍唔住响更衣室喊，覺得自己付出咁多努力都拎唔到金牌覺得好委屈。

原圖：巴塞羅那奧運會電視截圖