近排以巴衝突就再次爆發，相信唔少史友都見到喺網上流傳嘅一張張血腥相片，和平真係得來不易。而提起呢場斷斷續續百幾年嘅恩怨，起因除咗係因為「猶太復國主義運動」之外，其實仲同一個國家有莫大嘅關係，呢個國家就係英國喇！

其實早喺19世紀80年代果陣，好多流亡海外嘅猶太人就已經嘗試回流巴勒斯坦，早年佢哋係通過購買阿拉伯人嘅土地而定居，本來都係冇太多嘅衝突。而去到1896年，就有一位叫做西奧多·赫茨爾發起「猶太復國主義運動」，號召全世界嘅猶太人回歸故土，佢仲創立埋「世界錫安主義大會」、「猶太國民基金」。

時間去到1917年，成件事就有重大嘅發展，當時英國外長貝爾福（Arthur Balfour）就發表咗一封信畀英國猶太人領袖，信入面就表明「英王陛下政府贊成在巴勒斯坦建立一個猶太人的民族家園（Jewish national home），並將盡最大努力促其實現」。而當時其實以色列仲未立國，猶太人仲分散世界各地，貝爾福許下呢個承諾係具有法律效力，後世就認為佢嘅目的係幫借助猶太人嘅力量對抗同盟國。

去到1920年，國際聯盟委託英國管轄巴勒斯坦，英國就將託管地劃分為兩部分：東部為阿拉伯人居住地，西部為猶太居民區。二戰後，聯合國大會响1947年決議以將巴勒斯坦地區再分為以色列同巴勒斯坦兩個國家，1948年以色列國正式宣佈成立。之不過，呢個決議激發咗以色列同阿拉伯地區國家嘅衝突，結果爆發咗第一次中東戰爭。

最終以軍打贏咗阿拉伯聯軍，佔領巴勒斯坦總面積八成領土，導致96萬巴勒斯坦人無家可歸，淪為難民。自此，以巴之間以及以色列同其他阿拉伯國家嘅糾紛，到今日都未能解決。

原圖嚟自網絡