早幾日阿史就經過石塘咀一帶，見到一座外型相當特別嘅建築物，呢座建築物現時就由保良局管理，用作陳區碧茵頤養院之用。而阿史就覺得呢座建築物以磚塊砌成、外牆典雅對稱工整，應該就唔係普通嘅建築物，今次就同大家介紹下啦！

唔講真係未必知，呢座建於1923年嘅典雅建築物，原身部分竟然係一座消防局嚟架！呢座建築物早年係由潔淨局所管理，地下同埋地庫嘅部分就係當時堅尼地城消防局，而其餘幾職就係消防局職員嘅宿舍。早年呢個消防局係有十個消防員，仲設有一個電動水泵，當年嚟講都真係幾先進。

而後來呢個消防局就改名叫做西區消防局，並且喺1950年由市政總署接管，大部分地方就改為職員宿舍，其後仲開辦埋職工總會小學，慢慢就唔再係消防局喇！而去到1986年，成棟大廈仲由社會福利署管理，再以特惠租金嘅形式租畀保良局，成為今時今日嘅保良局陳區碧茵頤養院喇！

原圖嚟自網絡