响新冠疫情爆發前,唔少香港人都鍾意過澳門玩下食下賭下,以前未有港珠澳大橋前,香港人去澳門都係坐船居多,又快舒服。咁史友又知唔知,港澳快船係幾時通航呢?

港澳之間嘅快船服務,係响上世紀六十年代開始。响以往往來港澳之間嘅客運都係以大船為主,單程時間要成三粒鐘。而响1962年,已故賭王何鴻燊就成立咗信德船務有限公司,仲响1964年引入水翼船投入港澳航線服務,大大縮短航程所需時間。咁點解燊哥會開設快船服務呢?聰明嘅史友們點會估唔到係同佢個賭場有關呢?何鴻燊、葉漢、葉德利、霍英東等人响1961年取得澳門博彩專利權,希望吸引更多香港人過澳門賭,於是就開條快船航線將一批又一批嘅香港賭客送到去澳門賭。要知道當時水翼船係非常先進嘅運輸工具,價格並相當高,但燊哥知道若果可以令港澳之間航程時間大幅縮短,就啲人就會因覺得方便而過澳門賭返兩手,絕對值得投資。果然,有咗快船服務後每年就有唔少香港人過澳門同燊哥博命。

原圖:wikicommon