唔知史友們知唔知道，對北京圓明園嚟講，每年嘅5月24日都係一個特別嘅日子，而呢個日子亦都同一位香港人有關，佢就係曾憲梓喇！

阿史所講嘅呢個特別日子，其實就係北京圓明園所訂立嘅「曾憲梓紀念日」，咁點解圓明園會咁重視呢一位香港企業家呢？呢度就真係講開有段故喇！曾憲梓本身就係出生喺一個農民家庭，經過自身努力喺廣州中山大學畢業，後來去到泰國發展，幾經艱辛先至成為到「香港領帶之王」，創立到金利來公司、金利來集團。

喺捱出一番成就之後，曾憲梓就相當熱心公益，喺1970年代開始就致力於發展、捐助內地及香港文化教育、科技、體育、醫療與社會公益事業，據統計佢歷年嚟至少捐出12億。佢甚至仲成立埋「曾憲梓教育基金」、「曾憲梓載人航天基金」、「曾憲梓體育基金」幫助國家發展。

而提到佢同圓明園嘅關係，其實呢位慈善家早喺圓明園破碎之時，就喺1993年3月捐資800萬元人民幣用於修復圓明園圍牆，搶救、保護，而圓明園園方一直都銘記在心。直到2019年，北京圓明園園方贈送半身雕像畀曾憲梓，仲邀請佢到北京為其揭幕。而喺今年嘅「曾憲梓紀念日」，圓明園亦都有舉行紀念活動，仲喺曾憲梓雕像前齊唱佢生前最鍾意嘅《沒有共產黨就沒有新中國》。

原圖嚟自網絡