今時今日大家除咗電視之外都有唔少其他嘅娛樂，之但係對於老一輩嚟講，喺佢哋嘅年代就冇咁多其他嘅娛樂，電台、電視台就成為咗佢哋生活中重要嘅一部分，麗的映聲就曾經係唔少人嘅回憶。
麗的映聲，又叫做麗的呼聲，係英國麗的呼聲喺香港開設嘅分公司。呢間公司早喺1949年就喺香港成立，早年佢其實並唔係做電視先，而係從事電台。當時麗的映聲就喺1949年3月22日開台，當時安裝一個電台就要港幣25蚊，而且仲要每個月要交9蚊月費，真係唔係人人負擔得起，但當時作為第一間商營有線廣播電台，麗的嘅節目其實相當精彩，特別係後來嘅李我叔嘅天空小說節目，去到外地都好受歡迎。
做電台出晒名嘅麗的又係幾時開始做埋電視呢？答案就係1957年嘅當年今日喇！當時麗的又係作為第一間有線電視台開展電視業務，早年就以廣東話節目為主報導新聞同埋體育消息，但由於月費總共要70蚊，呢個價錢令到全港租戶數量極少，早期就只係得600幾部電視機。
而踏入八十年代，當時麗的電視英國母公司麗的映聲於加拿大投資洗衣廠失利，於是決定收縮東亞地區業務，將麗的賣咗畀3個澳洲財團；而呢三個財團又賣咗畀邱德根家族並改名為亞洲電視。
原圖嚟自網絡