呢幾日大家都好關注加拿大215名原住民兒童疑遭滅口嘅事,事件亦都引伸到國際社會諗起加拿大對印第安原住民兒童進行嘅種族滅絕行為。而提到對原住民嘅屠殺,其實最先開啟呢啲惡行嘅,可能係一個大家都意想不到嘅人,佢就係探險家哥倫布喇!

美國每年10月嘅第二個星期一都被訂為係哥倫布日(Columbus Day),呢一日係政府公認嘅法定假日,但對唔少印第安原住民嚟講,呢個歌頌哥倫布發現美洲大陸嘅日子,就好似喺傷口上面撒鹽,事關正正就係因為哥倫布令到印第安民族喺幾百幾年嚟都受到不平等嘅對待同埋屠殺。

哥倫布喺1492年8月3日帶住87名水手離開歐洲,經過2個月之後,佢誤打誤撞之下既冇搵到日本,只係去到佛羅里達附近嘅瓜納哈尼。當時飢寒交迫嘅哥倫布船隊係得到島上嘅原住民幫助,但佢冇打算感激佢哋,反而仲諗點樣可以統治呢班人。

時隔五年之後,哥倫布就再次嚟到呢個地方,當時原住民依然都係以豐盛嘅食物招待佢,但哥倫布呢次就係帶同武裝士兵嚟到島上,開始殺人放火搶劫,仲將原住民戰士被當做獵犬嘅狗糧、將捉嚟嘅土著當做奴隸。結果,哥倫布將島上嘅財產搶劫一空,仲捉走埋啲原住民,男嘅就做奴隸,女嘅就被迫賣淫。呢次經歷令到哥倫布無比愉快,甚至仲展開更大規模嘅「探險」,接近十年嘅種族屠殺亦都展開。

據保守估計,哥倫布登岸後嘅50年,因為疾病同埋其他原因死亡嘅美洲居民達到500萬,但當時土著居民人口其實係不多於1000萬,可想而之成件事有幾血腥。

原圖嚟自網絡