今年係建黨一百年嘅日子,喺建黨初年中國都係處於一片混亂,中國共產黨得以發展,除咗係因為自身堅毅之外,原來都有過一班外國友人嘅支持。近日中國外文局就舉辦咗一個「的 「攜手百年 命運與共─中國共產黨與外國友人主題展」,講述呢班外國友人點樣為中國革命事業作出貢獻同努力,而魏璐詩就係其中一位喇!
魏璐詩出生喺1908年嘅奧地利,佢喺1932年就獲得維也納大學嘅哲學博士學位,之後就為《維也納報》去到上海做自由欄目嘅記者,亦都係喺呢個時候,佢認識到宋慶齡、魯迅、史沫特萊呢啲當代嘅知名人士,瞭解到當時中國嘅學生運動同埋革命業。自此之後,佢亦都深受影響,決心要留喺中國,並且加入中國籍,希望可以為革命事業貢獻。
時間去到1936年,當時魏璐詩就已經成為成都《新聞快報》主任編輯,當時佢嘅工作就係為世界報導中國人民抗日戰爭嘅戰情;去到1943年,佢就去到重慶,幫助宋慶齡重建保衛中國同盟,擔任中央委員會委員,並為工合國際做各種對外宣傳工作,後來就去埋中國福利基金會。
而喺抗戰勝利之後,其實魏璐詩就曾經離開中國,去到聯合國秘書處任職,直到新中國成立之後,佢先喺1951年重新返到呢片土地,仲受邀成為中央人民政府新聞總署國際新聞局英文專家,自此之後佢就長期定居中國,再次喺1955年加入中國籍。其後,魏璐詩仲當選為第六、七屆全國政協委員,積極參政議政,關心國家大事,真係難得。
原圖嚟自網絡