早幾日係全年最大滿月「超級血月」出現嘅日子，唔少市民都好踴躍周圍去影個月亮，而講起呢種天文現象，阿史就諗起清代嘅一個女科學家喇！

阿史所講嘅呢位科學家就叫做王貞儀（1768－1797年），佢係江蘇上元人，本身屋企都唔係屬於書香門第，但佢嘅祖父王者輔就精通曆算數術，所以都收埋唔少相關嘅書籍，所以佢喺天文學、數學、醫學等學科都有住深入嘅研究。王貞儀自己要寫過一本著作《歲差日至辨疑》講解自己點解會鍾意天文曆算，佢喺書入面就表示「貞儀幼侍先大父惺齋公，公細訓以諸算法，既長，學曆算，復讀家藏諸曆學善本十餘種，潛心稽究十餘年不少倦」。

之但係，喺古時如果老百姓想觀天，分分鍾都會面臨牢獄之災，事關皇帝認為自己係授命於天，所以為咗確保天命不移，有人「觀天」可能就會被視為竄位，所以都嚴禁民間學習、研究天文曆算，除非係欽天監官員啦。

而呢位女子當時並冇就咁放棄，反而醉心研究「月食」、憑書本描述就可以自製工具解析日、月、地球三者相互位置變化，仲寫成《月食解》。當時，王貞儀就只係得20歲，亦都係世界上最早一個人可以完整對月食成因進行解釋。為咗表揚王貞儀喺天文學、數學上嘅貢獻，喺佢死後二百幾年，國際天文學聯合會以佢個名字命名金星上一個隕石坑。

原圖嚟自網絡