最近响網上睇到有人介紹廣東美食，就介紹到一款美食拖地叉燒，四層瘦三層肥，真係見到都想食。記得以前有電視節目介紹過澳門有一檔拖地叉燒，老闆仲講咗呢個名嘅由來。不過，好似又同香港名廚介紹嘅有啲唔同噃。

雖然唔知邊個版本先係正宗，咁阿史都一次過講啦！據元朗食神韜哥所講，拖地叉燒之名其實係因為以往師傅做呢款叉燒個陣，要指定用肥到肚腩拖地嘅大花白豬嚟做叉燒，因而得名。至於澳門燒味檔老闆個版本呢，就係話以前茶樓燒燒味，叉燒上嘅油呀麥芽糖呀就流到落叉燒尾端，加埋個架睇落就好似一個地拖咁，因而得名。其實仲有一個恐怖啲嘅講法，就係話係以前茶樓响天台製作燒味，舊式茶樓通常係有幾層，員工拎起啲叉燒由幾層樓落到地下，員工拎叉燒落樓個陣，往往因為啲叉燒太重而真係拖地，至於點解咁惹味就係因為响拖地個陣混合埋地下啲污糟嘢。嘩！至於史友們信邊個版本，自行決定喇！

原圖：chinapress