伯大尼修院曾經係大學出版社？

以往阿史都同大家介紹過牛奶公司喺薄扶林村嘅牧場遺跡，而提起呢條傳統村落嘅古蹟，其實仲有一座歷史悠久嘅教堂，呢座就係伯大尼修院喇！

伯大尼修院係喺1873年到1875年間由巴黎外方傳教會建成，係呢個傳道會喺東亞地區第一間療養院，專門畀傳教士休養。咁好地地點解會為傳教士起一間療養院呢？原來自從滿清政府簽署《北京條約》之後，法國嘅傳教士就可以喺中國自由傳教，而當時有唔少傳教士都唔適應中國嘅天氣，罹患熱帶疾病而又唔方便直接返到自己國家，於是就喺伯大尼修院休養喇！喺伯大尼修院自一八七五年建成至一九七四年關閉期間，一共接待咗接近六千名傳教士，真係估唔到有咁多人。

而隨住醫藥進步，伯大尼修院角色逐漸減低，去到1974年傳教會仲遷出呢個地方，伯大尼修院就轉售咗畀置地。原本係打算拆卸興建往宅，但政府就將呢個地方保留落嚟，喺1978年交予香港大學出版社使用，當時教堂入面係擺放咗印刷機同埋各類書籍；去到1997年就交咗畀政府產業署，直到2003年先至由香港演藝學院接手耗資8,300萬復修。