最近响內地網上流傳一段短片,話一位北京中年婦人坐巴士時因讓座問題而發難,大罵讓座人為「臭外地」,仲話自己係正黃旗人八旗貴族乜乜乜。呢件事因為關係到地域歧視,所以响內地引起咗一番討論。
北京作為滿清帝國嘅首都,八旗貴族後裔响京城生活並唔係乜嘢奇事,咁滿清滅亡時一班八旗貴族又點呢?响滿清亡國時,一班皇室子弟八旗貴族基本上都有特殊待遇,當然部分八旗子弟响清中葉以後只係得返旗人身份,係正黃旗鑲黃旗等先較顯赫,朝廷對佢哋資助都比較多。
不過,滿清亡國後,滿清貴族除咗皇室成員外,其他貴族子弟都要自力更生。其實响初期,唔少貴族子弟都仲過住衣食無憂嘅生活,據溥儀憶述,當時就有唔少皇室同貴族响天津住下小洋樓,包括溥儀自己。之但係,由於唔少貴族子弟不事生產,又大駛,所以佢哋最初都仲可以食老本,但食咗十年八載無晒貨之後就要變賣房產同珠寶,有啲仲敗晒阿爺留低副身家。有啲無咁有錢嘅就要開始打工,做生意有甚至拉人力車都有。據講,當時有唔少滿清貴族子弟就做咗警察。
簡單而言,唔少貴族最後都變咗做一個平民百姓,佢哋後代都係,咁唔怪得個位話自己係正黃旗人嘅中年婦人都會坐巴士啦!
原圖:網絡
評論:
共0 條評論