之前介紹咗中國共產黨一大紀念館近日開館嘅新聞,今次阿史就想講下一大會址呢個地方嘅故事。可能史友們都知一大會址係响上海黃浦區興業路76號,昔日嘅法租界望志路。不過,原來呢個地址曾經被遺忘咗,要搵咗一輪先搵得返。

中國共產黨一大舉行嘅地方,本身係其中一位代表李漢俊嘅屋企,據了解當年李書城、李漢俊兄弟租咗望志路106、108號兩棟樓房。不過,經過咗廿幾年嘅動盪,李漢俊呢個開會地方確實响邊就變得唔係好清楚。所以响1950年夏天,上海市委展開咗尋訪中共一大會址嘅工作。尋訪小組從周佛海之子周之友個度得知,周佛海寫過一本回憶錄,記低咗一大會址係响「貝勒路李漢俊家」,後嚟周佛海妻子楊淑慧去咗貝勒路附近搵,因為佢當年幫手佈置過會場。當佢見到「恆昌福麵坊」大字招牌嘅一棟樓房同白牆上一個「醬」大字,就覺得呢個地方應該係當年李漢俊屋企,亦即係中共一大開會地點。原本李氏兄弟响1924年搬走後,兩棟樓房連埋旁邊幾楝樓房就變咗做「萬像源醬園」,後嚟做咗麵坊。由於五楝樓經過多次改動,所以楊淑慧見到都只係有個大概印象。

後嚟有關照片交咗俾毛澤東同董必武過目,確定咗呢個地方係中共一大舉行地點,中央政府又委托咗當時其中一名代表李達到上海考察,佢去到恒昌福麵坊後就肯定呢個地方就係中共一大開會地點喇!

原圖:zgdazxw.com.cn