以往香港因為人口少，因此仲可以靠本地漁獲同農作物供應市民每日所需，但响戰後香港人口不斷增加，因此糧食進口成為供應本港糧食嘅重要一環，講到糧食進口就唔可以唔提「三趟快車」。

响上世紀五十年代，內地已經開始以普通貨物運輸方式為香港供應鮮活商品，但因所需時太長，唔少家禽畜類未到香港已經死咗。為保障港澳市民日常生活需求，周恩來總理响1961年指示外貿部同鐵道部交個方案。最終响1962年，國家對外經濟貿易部同鐵道部為適應供應港澳鮮活商品「優質、適量、均衡、應時」嘅要求，共同開創編號為751、753及755三趟「快車」，分別自上海、鄭州、武漢三地出發，每日滿載供港鮮活商品，經深圳再運抵香港。咁點解叫「三趟快車」呢？咁係因為當時火車係「定期、定班、定點」每日開三班，所以都習慣稱之為「三趟快車」喇！

「三趟快車」供港食物，係國家响上世紀為咗保證供港澳食品能夠穩定，成為咗一項基本政策。响上世紀八九十年代，「三趟快車」成為保證港澳食品供應嘅生命線，每天由內地經深圳運往香港嘅活禽活畜佔香港市場供應量99%以上，凍肉水產、瓜果蔬菜等佔一半以上。但隨著九十年代中期開始，深港兩路陸路物流發展迅速，供港澳鮮活產品入口逐漸由鐵路運輸轉為公路運輸，「三趟快車」亦因此逐步退出歷史舞台。

原圖：people.cn