「鴨巴甸炮台」二戰期間牽制日軍？

繼續同史友們介紹香港嘅特色古蹟，城門陵堡同埋魔鬼山嘅炮台阿史都同大家介紹唔少，而其實為咗應對二戰而設立嘅炮台唔止喺新界同九龍，港島亦都有唔少架，而呢次阿史就想介紹下鴨巴甸炮台！

鴨巴甸炮台，又叫做香港仔炮台，位於南區嘅鴨脷洲玉桂山之上，係當時英軍為咗加強港島西南部海岸防線而喺1939年設立。之所以呢個地方會以「鴨巴甸」命名，全因為喺香港開埠初期，當時香港仔一帶英文係叫做Aberdeen，於是當時嘅人就直接用英文發音直譯為中文「鴨巴甸」，而鴨脷洲又叫做「鴨巴甸島」，所以炮台亦都叫做「鴨巴甸炮台」

咁言歸正傳，其實二戰期間唔少炮台都冇正常咁發揮到應有嘅作用，咁呢座裝有兩門4吋後裝海防炮、保護香港仔海軍基地嘅炮台又係點呢？原來喺1941年12月8日，當香港保衛戰爆發之後，呢個炮台就係由香港義勇防衛軍駐守，喺開戰之時就受到多次飛機轟炸，但炮台整體就冇被摧毀。而當日軍喺12月18日登陸港島北之後，日軍嘅艦艇其實仍然係受到港島嘅炮台牽制都冇辦法輕易靠近香港島。之不過，去到12月25日，守軍喺彈藥不足嘅情況下無法扭轉敗局，炮台先至失守。