之前介紹過唔少滿清皇族子弟進入民國時期就敗晒阿爺留低個副身家,今次阿史就搵咗個個案介紹下,故事主人公就係鄭親王照煦。
鄭親王照煦係末代鄭親王,佢嘅祖先即歷代鄭親王都係相當顯赫,因為初代鄭親王係努爾哈赤三弟舒爾哈齊之子,亦係清初「八大鐵帽子王」之一,更加係唯一非帝王直系子孫。因為係「鐵帽子王」關係,歷代鄭親王都可以世襲唔被降爵位,即使去到晚清時間,鄭親王都相當出名。至於末代鄭親王照煦响1900年出世,1902年就繼承爵位。不過都算佢唔好彩,清朝响1912年覆亡,佢就成為落難皇孫。同唔少皇族子弟一樣,威慣食慣又唔做嘢自然好快駛晒啲錢,加上佢做生意失敗收場,於是佢响1920年代就做咗件事紓緩財困。
據資料顯示,佢將位於北京嘅鄭親王府抵押咗西什庫天主教堂嚟換嚟一筆錢俾佢繼續駛,而王府响1925年又租給中國大學為校址。另外,啲錢駛晒後佢先拆祖先陵寢建築,後嚟直頭挖祖墳變賣祖先嘅陪葬品,後嚟响佢挖墳時被人發現添。
相信照煦嘅事蹟只係眾多落難皇族子弟一個寫照,唔少有錢佬都因為有個敗家仔,搞到借錢賣樓賣舖。所以呢啲事,有幾奇啫。
原圖:bjxch.gov.cn