今朝早就同史友們介紹咗我國57歲太空人、第三次出征太空嘅聶海勝,呢位「英雄航天員」最早參加嘅飛行任務其實就係2005年嘅神舟六號,之但係我國第一次載人嘅飛行任務其實就係2003年嘅神舟五號。

神舟五號係我國第一次嘅載人航天任務,而楊利偉亦都係我國第一位進入太空嘅太空人,咁呢位傳奇人物嘅經歷到底又係點呢?呢位出生喺1965年嘅遼寧人早喺1998年就已經被選為太空人,亦都係喺呢個時候開始進行訓練,喺十四位精英候選人當中當選成為執行任務嘅太空人,真係相當唔容易。

喺2003年10月15日第一次嘅任務當中,其實楊利偉係需要獨自一人進入太空,難度真係相當高,而佢當時喺太空上其實算得上係相當放鬆,既可以如常咁報導情況,又喺太空上食足三餐。喺任務中途,佢仲向鏡頭展示五星紅旗以及聯合國旗,喺環繞地球軌道十四周之後,楊利偉最終就喺2003年10月16日降落內蒙古,標誌住中國成為第三個掌握載人太空飛行技術嘅國家。

原圖嚟自網絡