上次講咗民國時期上海女星胡蝶點樣响東縱幫助之下逃離香港，而呢件事就有一個關鍵人物，就係軍統頭目戴笠。

戴笠係國民政府軍事委員會調查統計局副局長，國民政府掌政時期嘅秘密警察頭目，長期從事特工同間諜工作，亦係蔣介石心腹。咁佢同胡蝶又有乜關係呢？响上世紀三十年代嘅上海灘，胡蝶呢位影后譽滿申城，唔少達官貴人公子哥兒都被佢迷到，據講戴笠一直對呢位影后相當傾慕。不過，當時胡蝶同商人潘有聲結婚，戴笠就似乎未有行動住。直至抗日戰爭爆發，胡蝶一家去咗香港，但後嚟香港淪陷。於是戴笠就出手託上託東縱幫手協助胡蝶逃離香港，最後胡蝶成功逃離香港。

當然！戴笠救胡蝶自然有目的。蝴蝶離開香港後，輾轉去咗抗日大後方重慶市。當時戴笠對胡蝶可以話係「照顧有加」，仲嚟一招金屋藏嬌，就咁胡蝶成為咗戴笠嘅情婦。後嚟戴笠真係想娶胡蝶為妻，不過佢响1946年死咗，胡蝶先獲得自由，再次遷居香港。

所以，戴笠助胡蝶逃離香港，原來係有陰謀。