相信尋晚唔少史友都有睇到世界女排聯賽,呢場比賽中國隊以3比0擊敗美國,令到原本全勝嘅美國隊迎來首次失利。中國女排喺近年嚟得到相當好嘅發展,但其實喺上世紀都面對住唔少艱難嘅時候,阿史就諗起一個人物可以同大家介紹下,佢就係「鐵榔頭」郎平喇!

出生喺天津嘅郎平喺1973年就入選北京工人體育館體校排球班,喺5年之後就入選埋中國女排。而喺1981年,對中國女排嚟講係相當重要嘅一年。呢次係喺日本舉行嘅第3屆世界盃女子排球,有嚟自巴西、保加利亞、美國同埋日本等嘅女子排球勁旅一同進行11日嘅比賽,中國隊就先後戰勝巴西、蘇聯、南朝鮮、美國、古巴,最後以3:2戰勝上屆冠軍日本隊,以七戰七勝嘅成績成功拎到第一次世界冠軍,當時郎平就係「優秀運動員獎」得主。

自此之後,郎平亦都喺得第9屆世界女排錦標賽冠軍、洛杉磯奧運會金牌,協助中國女排取得「三連冠」;其後佢就喺1986年代表中國成功衛冕世界女排錦標賽之後一度退役求學;但喺1990年一度回隊參加第11屆世界女子排球錦標賽,決賽中敗於蘇聯女排之後又再次退役,展開佢嘅教練生涯。當中都有唔少傳奇故事,阿史留返下次再同大家介紹啦!

原圖嚟自網絡