之前阿史介紹過「數碼敦煌工程」，相信去過敦煌莫高窟嘅史友都知道，參觀呢個世界知名嘅文化瑰寶時，响各個窟內係唔可以影相。唔少人包括阿史一直以為唔俾影相係因為怕相機嘅閃光燈會對壁畫造成損害，但幾年前敦煌研究院就有唔同嘅解釋。

當時敦煌研究院有位副院長就同記者講，話外界認為閃光燈強光會對壁畫產生化學作用導致甩色，係一個誤解。另外，有人認為唔俾拍攝係因為怕敦煌藝術外傳，呢個亦係一個誤解。

咁真正原因係點呢？答案就係石窟內空間狹窄，如果俾客人影相，咁個個停留响窟內就有機會造成秩序混亂。同時，如果俾遊客响窟內影相，會令遊客留响窟內時間加長，窟內二氧化碳量、濕度同溫度都會出現變化，壁畫顏料可能會因為咁而溶解導致壁畫畫面脫落。

簡單而言，就係怕遊客因掛住影相而唔俾留响洞窟太耐。