中國歷史上首位奧運冠軍——許海峰

近排阿史都同史友們介紹唔少我國嘅傳奇運動員，而講起奧運嘅歷史、講起中國點樣擠身成為運動嘅強國，就要由呢個傳奇人物開始介紹，佢就係中國歷史上首位奧運冠軍——許海峰喇！

許海峰出生喺1957年嘅安徽，去到1982年先至加入安徽省射擊隊，開展佢射擊生涯。而喺佢加入省隊冇耐，佢就已經喺1983年拎到五運會兩面銀牌，真係相當有天份。而喺呢次拎到獎牌之後，佢喺1984年甚少支援之下去咗參加美國舉行嘅奧運男子自選手槍項目，以566環嘅成績拎到奧運會首枚金牌——50米手槍慢射金牌，呢次亦都係中國奧運會金牌嘅「零的突破」，而呢面金牌現時就陳列喺中國革命博物館。

許海峰嘅射擊生涯唔單止咁，佢喺1986年亞運會入面就拎到三個冠軍、1990年北京亞運會摘下4面金牌，喺自選手槍項目入面連續破咗多次世界紀錄，真係精英中嘅精英。而喺佢退役之後，佢就逐步成為國家射擊隊總教練，帶領多位運動員成為奧運獎牌得主。