提起清代嘅光緒皇帝,唔少人都知道佢有個寵妃珍妃。其實除咗珍妃之外,珍妃個家姐都係光緒帝嘅妃子。

呢位珍妃家姐就係瑾妃喇!瑾妃係滿洲鑲紅旗人,屬他他拉氏,佢同珍妃都係戶部右侍郎長敘之女。佢兩姐妹响光绪十四年即1888年被選中入宮。最初入宮身份係嬪,後嚟獲封為瑾妃。同珍妃唔同,雖然瑾妃得唔到光緒寵幸,但慈禧太后就對瑾妃相當寵愛,响八國聯軍攻入京城時,慈禧太后攜宮眷逃出紫禁城,其中一人就係瑾妃,而珍妃就被慈禧整死咗。

不過,隨住光緒皇帝同慈禧太后先後離世,加上隆裕皇后响清室遜位後病死咗,瑾妃就成為紫禁城內最話得事嘅人,被尊為端康皇貴太妃,連溥儀呢位皇帝都要睇佢面色做人。所以有人就話,光緒帝一后兩妃,笑到最後嗰位係瑾妃。