《華商報》中環荷里活道創刊 揭露日本侵華罪行

早幾日就同史友們介紹到港九大隊進行過嘅文化界秘密大營救事蹟，而當時日軍喺佔領香港之後之所以會大規模搜捕文化界人士，除咗係想逼佢哋宣揚「大東亞共榮圈」之外，都同接下嚟要介紹嘅呢份報紙有關。

喺1937年抗戰爆發之後，當時香港仲未受到戰爭波及，所以就有唔少文化界人士嚟到香港，就好似有作家夏衍、茅盾，記者鄒韜奮、范長江，思想家梁漱溟等。而由於一時之間有咁多精英文化界人士，而佢哋亦都有一顆救國嘅心，於是就喺八路軍駐香港辦事處負責人廖承志主持下，鄒韬奮、夏衍、茅盾、范長江、喬冠華、金仲華、胡仲持等七人一齊創辦一份宣傳抗戰嘅報紙。

於是，呢份《華商報》就喺1941年4月8日創刊，報社設立喺中環荷里活道102號，由愛國商人、華比銀行經理鄧文田擔任報紙總經理。《華商報》喺成立之後，就大力宣傳抗日民族統一戰線，介紹八路軍、新四軍、華南遊擊隊嘅抗戰事跡，揭露日本侵華罪行，唔單止喺香港、內地發行，仲喺新加坡、檳城、越南等地大受歡迎。