南邊圍旅遊巴翻側事故

上次同史友們重溫2003年屯門公路九巴墮崖事故，有史友就私信阿史問香港仲有無啲重大交通事故。其實造成重大傷亡嘅交通事故阿史一宗嫌多，希望司機大佬們响去到一啲交通意外黑點加倍留神同小心駕駛。

响2008年5月，西貢一個交通黑點就發生一宗造成重大傷亡嘅交通事故，當時兩部載有幾十名一間教會教友嘅旅遊巴，駛至新西貢公路南邊圍時，懷疑車速過快同煞車皮磨損，响落斜轉入迴旋處時失去平衡，全車翻側撞向隔音屏障旁，導致大量乘客被困，最終事故釀成19死43傷。

意外發生後，有關部門就响事發路段嘅「長命斜」髹上更鮮明更易睇嘅黃色減速線，避免再有交通意外發生。