一直以來，抗戰時期國民政府最高話事人蔣介石都得到美國支持，美國對蔣介石以至國民政府嘅影響力甚至到二戰後猶在。之不過，有史友响留言提及過，蔣介石响抗戰時同美國關係無想像中咁好，甚至有美國高級將領同佢不和。

同蔣介石不和最出名個位美軍高級將領就一定係史迪威將軍。史迪威响戰爭開始之前曾三次駐華，識講流利漢語，算係一名中國通。1942年初，美國總統羅斯福就派史迪威到中國為中方擔任顧問，並協調亞洲地區盟軍之間嘅關係。史迪威到咗重慶後，被指派為蔣介石嘅參謀長、中緬印戰區美軍總司令、美國租借援華物資專門負責人。不過，响1942年日軍入侵英屬緬甸，中國派出遠征軍造成大量傷亡，蔣介石就抱怨史迪威指揮不力。亦好難怪蔣介石，因為入緬部隊唔少係佢自己嘅直屬精銳，唔肉痛就有假。另一方面，史迪威就抱怨中國將領水平差。所以蔣介石同史迪威互相睇唔順眼，蔣介石亦希望美國換走史迪威。由於史迪威同國民政府關於戰略意見衝突，最終响1944年史迪威就被美國總統羅斯福召回。

有關史迪威嘅故事，就有好多民間傳說，篇幅所限，下回分解。