之前介紹咗蔣介石同美國將領史迪威响抗戰期間點樣唔妥對方,後世唔少評語都話史迪威性格高傲,睇唔起當時嘅中國將領。不過,其實有啲中國將領係得到佢認同同欣賞。

其中一位就係民國時期嘅名將孫立人。孫立人响1942年任師長帶領新三十八師到緬甸作戰,後嚟拒絕同上級杜聿明撤回雲南,改為帶隊撤往英屬印度,結果成功無留大部分兵力,响印度改編成新一軍,開始裝備美械同接受訓練。呢支中國駐印軍,就由史迪威擔任總司令一職。

有趣嘅係,史迪威同孫立人個性其實有啲相似,都係好高傲,所以佢兩個唔只一次有衝突,包括對部隊改編、訓練同作戰計劃,最正嘅係孫立人留學過美國,可以用英文同史迪威嘈。不過,响史迪威被換走時就寫咗封信俾孫立人,話對建立到一支新一軍呢支現代化軍隊非常自豪,仲希望孫立人忘記佢哋之間嘅誤會,能夠當佢係一個朋友。

講多句,1942年响仁安羌之戰,中國遠征軍擊敗日軍而令孫立人名聲大振,亦係史迪威代表美國政府向孫立人授勛。

原圖嚟自網絡