尋日就同史友們講到有「亞洲第一飛人」之稱嘅柯受良因為唔想第一個飛越長城嘅係英國人,所以自己就挺身而出做咗呢件咁傳奇嘅事,而佢犀利嘅事又點止一件,講到最威水嘅當然係飛躍黃河壺口瀑布喇!

喺1997年6月1日,柯受良為咗慶祝香港回歸,就駕駛住佢架三菱Lancer Evolution IV RS飛越長度55米嘅黃河天塹 - 壺口瀑布,成個過程由中國中央電視台、鳳凰衛視中文台現場直播,真係非一般嘅壓力。而呢次挑戰成功之後,亦都令到佢得到「亞洲第一飛人」嘅稱號,呢啲係風光嘅一面,但唔知史友們又知唔知,喺呢次飛越之前,其實柯受良係失敗過幾次呢?

據講喺佢進行呢次挑戰之前,其實就已經進行過三次大規模嘅試飛,而三次都係以失敗告終,第一次佢就係喺東莞進行試飛,以38米嘅成績失敗告終;第二次經過總結經驗之後,佢就以42米嘅成績落地;而去到第三次,佢亦都只係飛級到43米。換言之,柯受良係喺相差好多米嘅情況之下進行呢次挑戰,過程中佢仲用盡千萬積蓄去準備,睇落得幾秒嘅舉動,其實代價真係非常大。

原圖嚟自網絡