新建築群損歷史價值 利物浦海上商城世遺遭除名

世界各地有唔少歷史悠久嘅建築物，關於呢啲歷史名勝被列為世遺嘅新聞相信大家都聽唔少，但如果講到被世遺除名，唔知大家又聽過未呢？

日前聯合國教科文組織就宣佈要將英國城市利物浦喺世界遺產名錄上除名，位於英格蘭嘅西北部利物浦海上商城早喺2004年就被列入世界遺產名錄，當時嘅原因就係因此呢個海上商城見證咗十八、十九世紀世界最主要貿易中心嘅發展過程，而利物浦又喺英聯邦發展史上有好重要嘅角色，係運送大量人口嘅港口，就好似由北歐向美洲運送奴隸等等。

之不過，由於呢個地方近年過度發展，就好似有英超球隊愛華頓五億英鎊新球場等項目，嚴重破壞咗呢個城市嘅海岸線，損害歷史價值，於是聯合國教科文組織召開世界遺產大會，以十三票贊成五票反對通過將利物浦海上商城自世界遺產名錄上除名，令到利物浦成為迄今第三個從世界遺產名錄遭除名嘅地點。