「南昌起義」爆發

又嚟到八月一日，相信唔少史友們都知道今日正正就係八一建軍節（中國人民解放軍建軍紀念日）嘅日子。顧名思義，呢一日係用作紀念建軍，咁到底呢個日子又係點樣嚟呢？原來係同一件事有關！

喺北伐戰爭期間去到結束，國民黨嘅新軍閥除咗內戰，仲喺1927年發動過「四‧一二清黨」，屠殺咗大量共產黨人，而為咗回應國民黨嘅舉動，共產黨人就發動咗一系列嘅武裝反抗，其中一次規模較大、影響力較深遠嘅正係「南昌起義」。

喺1927年8月1日凌晨，以周恩來為首嘅前敵委員會以及賀龍、葉挺、朱德、劉伯承等統領組成軍隊之下，喺江西省省會南昌發動武裝起義，對抗蔣介石對中國共產黨實行嘅剿共鎮壓政策。呢次行動亦都建立咗由中國共產黨領導嘅武裝部隊，所以去到1933年6月30日，中國共產黨中央革命軍事委員會決定每年8月1日定為中國工農紅軍紀念日，後來就成為解放軍建軍紀念日。