呢幾日相信大家都睇唔少關於我國田徑、羽毛球、舉重嘅奧運史,讀過唔少關於呢班傳奇運動員嘅文章,而喺呢班運動員當中,其實有一個人真係相當犀利,佢所創下嘅紀錄就算嚟到今時今日都好難有人破得到,呢個人就係號稱「不敗女神」嘅跳水運動員高敏。

高敏自四歲開始就學習游水,但唔講唔知,佢其實最初係練習體操先,後來受到導師挑選先至開始進行跳水訓練。佢喺1980年就入到四川省跳水隊,以12歲之齡拎到全國跳水冠軍,並且喺1985年入選中國國家隊。

咁呢位傳奇人物又係幾時開始進行世界賽呢?答案就係1986年,佢喺第5屆世界游泳錦標賽奪得3米跳板跳水冠軍,後來喺1988年漢城奧運會贏得中國首枚奧運會跳板跳水金牌,真係意義重大。高敏嘅成就唔單止咁,佢係集世界游泳錦標賽、世界盃及奧運會嘅「大滿貫」得主,喺佢七年嘅職業生涯入面,佢喺所有嘅世界大賽都保持全勝,就連奧運嘅比賽都係一樣,難怪會有「不敗女神」呢個稱號!

原圖嚟自網絡