呢排大家都經常回顧香港嘅傳奇運動員，既然講開，阿史都想同大家回顧一下香港嘅奧運史，咁就要由第一代嘅奧運代表團開始講起，唔知史友們又知唔知香港係幾時第一次參加奧運會呢？

答案就係1952 年喇！其實早喺戰前，香港就已經建立到一套體育文化，當時唔少外籍人士都好鍾意進行運動消閒，喺港九一帶都有唔少俱樂部出現，主要係以游水、賽艇等水上運動為主。隨住呢啲運動開始流行，唔單止係外籍人士鍾意玩，慢慢都有唔少華人加入，由此就出現唔少華人嘅運動健將。 

喺1951年，港協暨奧委會義務秘書長沙理士致函國際奧委會，結果就得到奧委會回覆，指香港可以喺1952 年參加奧運，而香港業餘游泳總會甚至仲喺之前進行咗慈善晚會籌得 1 萬元經費。於是，喺天時地利俱齊嘅情況下，香港就有兩男兩女嘅泳手出戰1952 年赫爾辛基奧運會，佢哋分別係蒙帝路、張乾文、施伊架以及郭錦娥4 人，佢哋分別參與 6 個游泳項目，當中有「太平山飛魚」之稱嘅張乾文仲打破當時香港紀錄，成為當屆唯一一位晉級到準決賽嘅香港代表，真係唔簡單啊！

原圖嚟自網絡