今屆東京奧運會港隊取得佳績，全城即時出現運動狂熱，特首就話政府對體育發展肯定唔係三分鐘熱度喎，仲即時公布五項支援體育措施，包括咗2024年建成香港體育學院新大樓。

講到訓練香港運動員，唔知史友們仲記唔記得响八十年代沙田有一間銀禧體育中心呢？銀禧體育中心响1982年成立，係香港第一個專為訓練運動員而設立嘅精英體育訓練中心，响當年嚟講仲係東南亞數一數二最具規模嘅體育訓練中心。當年銀禧就有三個主要體育館，為籃球、劍擊、游泳、乒乓球、壁球、網球、足球、體操等項目提供訓練場地，並由世界級專業教練統籌10項重點發展體育項目嘅運動員培訓工作。後嚟更同中大合辦運動創傷診療室，為運動員提供更周全嘅運動科學同醫療服務。

後嚟香港响1986年亞運會取得一金一銀三銅佳績，於是體院就推出運動員獎學金計劃，資助優秀運動員，等佢哋可以專心投入訓練為香港取得好成績。咁呢間銀禧體育中心依家去咗邊呢？响1991年，政府採納「香港體育事務發展前瞻顧問研究報告書」建議，銀禧體育中心就升格為香港體育學院喇！

原圖：hkmemory