下個星期就係東京殘奧舉行嘅日子，相信唔少史友都會繼續支持我哋嘅運動員，但提到殘奧，唔知史友們又知唔知呢個運動會係有咩原因出現呢？

答案就係同二次世界大戰有關喇！喺20世紀中期，全球大部分國家都陷入戰火當中，呢場世界大戰最終造成5,000萬人死亡，多達3,500萬人傷殘，單單係德國就有接近260萬傷殘人士，呢個數字認真誇張！

由於世界上有咁龐大嘅人口都面臨唔同程度嘅傷殘，當時猶太裔英國神經外科醫生路德維希·古特曼（Ludwig Guttmann）成立「國家脊柱神經損傷治療中心」，希望可以幫到病人，而「運動治療」就係其中一樣。之不過，要鼓勵病人去嘗試新治療方法唔係咁容易，要令到佢哋自己有價值同埋受到尊重先至可以成事。於是喺1944年，喺唔少醫院就開始出現簡單嘅球類比賽、射箭、籃球和乒乓球等運動療法，甚至後來連馬拉松都出現埋。

見到咁多殘疾人士喺運動方面都可以咁出色，呢種治療方法亦都由英國推動到其他國家。古特曼運動療法喺歐洲被廣泛運用，甚至仲舉行過第一屆殘疾人運動會；雖然初時國際奧委會並冇注意呢啲比賽，但後來當殘疾選手成功超越健全選手，1960年由古特曼舉辦嘅殘疾人運動會「Paralympics」就引嚟23個國家、約400名殘疾輪椅運動員參賽，並且喺奧運場館舉行，後來仲被國際奧委會承認，殘奧會就係咁樣誕生！

原圖嚟自網絡