繼續同史友們介紹香港每區嘅古蹟，阿史就喺網上睇到位於灣仔嘅百年古跡自從翻新之後就被用作餐廳嘅用途，而近排呢個地方又有新嘅餐廳進駐。不過呢個都唔係重點，重點係原來早年嘅「和昌大押」只係單丁相連嘅其中一幢樓，而唔係全座喎！

和昌大押位於灣仔莊士敦道60至66號，今時今日大家望過去可能都會睇得出係一座樓高四層嘅建築物，但如果有史友早年喺呢區生活過，可能都會知道其實呢度係有四幢四層嘅建築物架！呢排面向莊士敦道嘅建築群，分別就係喺1888年至1900年代建成，至今已經有百年歷史。每幢嘅建築由450至700平方呎不等，主要係以木材為基本結構，牆身就係以磚鋪成，以往四幢都有相連嘅陽臺長廊，但後來為咗增加室內面積，陽臺就裝上大窗。

咁史友們都知道轉角位置嘅66號正係「和昌大押」所在之處，咁其餘幾座建築又係做啲咩呢？64號就係由「余氏宗親會」於1966年購入，後來做成「均記」雀鳥店；62號就係專門賣洋貨嘅「永興百貨商店」；去到60號就係「東區美容院」等。就咁聽啲店舖名，上一代香港嘅畫面都即時出晒嚟！

原圖嚟自網絡