提起鍾銀蘭呢個名，部分史友可能未必知係邊個，但如果講到宋代王詵《煙江疊嶂圖》、宋高宗趙構《真草書養生論卷》呢啲作品，史友們就一定知。咁到底兩者有咩關連呢？原來呢批名跡係全靠鍾銀蘭鑑定先至會成為上海博物館「鎮館之寶」之一，而呢位咁傳奇嘅古書畫鑑定家日前就因病逝世享年九十歲。

鍾銀蘭早喺1952年喺上海博物館成立初時就通過招考分配入到博物館從事文物工作，經過自己嘅研究同埋跟從名家學習，佢喺八十年代終於成為國家文物鑑定委員會嘅成員。咁到底鑑定字畫係要點樣做呢？早年鍾銀蘭就表示，整體嚟講就需要先睇作品嘅氣息，再由局部睇畫家嘅筆性、題款、印章同埋材料，然後再根據史料作出核實，真係唔簡單。

鍾銀蘭係被稱為「自學成材」嘅畫鑑定家，宋高宗趙構《真草書養生論卷》、董其昌繪畫立軸等名跡，都係因為佢鑑定而入藏，提到最知名嘅長卷水墨《煙江疊嶂圖》，其實喺去上海博物館之前，就有唔少專家斷言「畫真、詩偽」，但鍾銀蘭憑自己嘅方案判斷《煙江疊嶂圖》同王詵其他畫作、書法筆墨完全一致，最後仲得到廣大專家認同，真係犀利！

原圖嚟自網絡