之前講過關羽第二次俾人「斬頭」,本來荊州市想借關公開發旅遊景點呢個諗法又似乎落空咗。其實,以歷史人物作為景點題材都唔係今時今日先有,甚至有出現一個人物有幾個地方紀念添,亦因為咁好多時就出現鬧雙胞情況。

就好似同關羽同一時代嘅三國名將趙雲,就曾經出現過「趙雲故里」嘅爭論。根據《三國志》所載,趙雲係常山真定人。雖然後世對常山真定位置係今日河北省無太大質疑,但真定到底响邊就有唔同講法。河北有個地方叫正定,當地文化部門嘅就話正定古稱就係真定,而呢個地方自古以來都被視為趙雲故里,仲有清代時留落嚟嘅「漢順平侯趙諱雲故里」石碑,亦有趙姓後人赴正定祭祖懇親,所以話夠晒證據咁話。

不過,河北另一個地方臨城就話個度先係「趙雲故里」,因為呢個地方响漢代係屬常山郡範圍之內,臨城縣附近嘅澄底村外,有一個相傳係趙雲嘅大墓塚,當姓趙姓人都會去個度做祭祀。而响2005年,臨城發現一塊「趙雲故里碑」嘅石碑,所以,當地人就話臨城先係正宗「趙雲故里」。

正定、臨城呢兩個縣爭做「趙雲故里」,背後目的相信史友們都會諗到。

原圖:fengsuwang.com